Félix Morisseau Leroy : « M pral fè yon ti vwayaj nan lalin »

14188213_10157401503950230_4415044219058026143_o
Photographe : Stephen Malagodi

 

M pral fè yon ti vwayaj nan lalin
Anba isit m bouke soufri
Bò isit bagay la gentan di

M pral fè yon ti vwayaj nan lalin
Yo di m la nan pwen sa
Nan pwen bon moun vye moun
Nan pwen nèg sòt ak nèg lespri
Nan pwen moun lavil ak moun nan mòn

Tout òm se lòm nan lalin
Tout òm pale yon sèl lang
M pa kapab ankò sou latè ya
Sivilizasyon ap pete fyèl mwen
Sivilizasyon ap wete nanm mwen

Kote ou vire gade
Moun ap touye moun
Sivilizasyon ap fini ak ras la
M pral rete nan lalin

Yo di m la bon
Sivilizasyon fin pase depi lontan
Moun la bliye move tan sa a
M prale fè yon vwayaj nan lalin

Yo di m la nan pwen wa
Nan pwen chèf seksyon
Nan pwen jij de pè
Nan pwen isye
Nan pwen pap seyè

Fò m al fè yon vwayaj nan lalin
E bèl yo di m la bèl
Lannwit fè klè pase lajounen
Pa gen lè pou nèg dòmi
Pa gen jou pou travay jou pou banbòch

Lannwit ou gade latè klere
Latè klere pase solèy
Zetwal tou prè ou kou koukou sou pye bwa
Nan pwen chalè
Nan pwen fredi
Nan pwen mizè
Nan pwen labou
Tout nèg bliye lagè
Bliye sivilizasyon
Kou granmoun bliye kòklich,
Lawoujòl ak dantisyon.

M pral viv nan lalin
Lèswa m a tire kont pou timoun
M a di yo toutan latè ap vire
Gen yon gwo madanm
Yon gwo lougawou fanm
Yo rele sivilizasyon
K ap kraze ti nèg kou foumi

Félix Morisseau Leroy
Djakout 1, 1953

Retranskripsyon : Fabian Charles

LAISSER UN COMMENTAIRE

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s